सोलापूर, दि.
– सोलापूर जिल्ह्यात अतिवृष्टी आणि सीना नदीच्या पुराने हाहाकार माजवला असताना, मुख्यमंत्री देवेंद्र फडणवीस यांनी आज पूरग्रस्त भागांची पाहणी करत नागरिकांना मोठा दिलासा दिला. “राज्य शासन संकटकाळात पूरग्रस्तांच्या पूर्णपणे पाठीशी असून नागरिकांना सर्वोतोपरी मदत केली जाईल,” अशी महत्त्वपूर्ण ग्वाही त्यांनी दिली.
मुख्यमंत्री फडणवीस यांनी माढा तालुक्यातील निमगाव आणि दारफळ सीना या गावांना प्रत्यक्ष भेट देऊन नुकसानीची पाहणी केली आणि पीडित नागरिकांशी संवाद साधून त्यांच्या व्यथा जाणून घेतल्या.
२ हजार कोटींचा निधी मंजूर, हात आखडता घेणार नाही!
प्रचंड नुकसान झालेल्या शेतकऱ्यांशी बोलताना मुख्यमंत्री म्हणाले, “अतिवृष्टी व पुरामुळे ग्रामस्थांचे मोठे नुकसान झाले आहे. शेती पिके, जनावरे, घरे आणि व्यावसायिकांचेही खूप मोठे नुकसान झाले आहे.” त्यांनी नागरिकांना धीर धरण्याचे आवाहन केले.
मदतीची घोषणा करताना ते म्हणाले:नुकत्याच झालेल्या मंत्रिमंडळाच्या बैठकीत पूरग्रस्तांना तातडीची मदत म्हणून दोन हजार कोटी रुपयांचा निधी मंजूर करण्यात आला आहे.
यापुढेही पूरग्रस्तांना आवश्यक मदत देण्यासाठी शासन हात आखडता घेणार नाही.
टंचाई काळात ज्या निकषांप्रमाणे मदत केली जाते, त्याचप्रमाणे ओल्या दुष्काळातही ही मदत केली जाईल.
नदीपात्र बदललेल्या दारफळ सीनाला विशेष मदत
दारफळ गावात पुरामुळे मोठे नुकसान झाले आहे. नदीपात्रात मोठ्या प्रमाणात पाणी आल्याने नदीने पात्र बदलले आणि गावाचा मोठा भाग पाण्याखाली गेला. याबद्दल चिंता व्यक्त करत मुख्यमंत्री म्हणाले, “घरे, अन्नधान्य, शेती आणि जनावरांच्या नुकसानीसाठी शासन मदत करणार आहेच. पण त्यासोबतच रस्ते, शाळा, शेतरस्ते आणि वीज व्यवस्था यांसारख्या सार्वजनिक सुविधांसाठीही आवश्यक ती सर्व मदत केली जाईल. तसेच, व्यावसायिकांनाही त्यांच्या नुकसानीसाठी स्वतंत्र मदत देण्यात येईल.”
प्रारंभी, निमगाव येथे नुकसानीची पाहणी करून मुख्यमंत्र्यांनी नागरिकांच्या अडचणी जाणून घेतल्या आणि या संकटातून बाहेर पडण्यासाठी आवश्यक मदत करण्याचे आश्वासन दिले.
या पाहणी दौऱ्यात पालकमंत्री जयकुमार गोरे, खासदार धैर्यशील मोहिते पाटील, आमदार रणजीत मोहिते पाटील, आमदार अभिजीत पाटील आणि विभागीय आयुक्त डॉ. चंद्रकांत पुलकुंडवार यांच्यासह अनेक स्थानिक नेते व प्रशासकीय अधिकारी उपस्थित होते.
मुख्यमंत्र्यांच्या या भेटीमुळे आणि तातडीच्या मदतीच्या घोषणेमुळे सोलापूर जिल्ह्यातील पूरग्रस्त नागरिकांना मोठे मनोधैर्य मिळाले आहे.
