अतिवृष्टीग्रस्त बोहाळी, अनवली आणि सरकोली गावांना भेट देऊन नुकसानीची पाहणी
पंढरपूर, दि. ५ ऑक्टोबर २०२५ –
सोलापूर लोकसभा मतदारसंघाच्या खासदार मा. प्रणिती शिंदे यांनी पंढरपूर तालुक्यातील बोहाळी, अनवली आणि सरकोली या अतिवृष्टी व पूरग्रस्त गावांना भेट देऊन शेतकऱ्यांच्या झालेल्या नुकसानीची पाहणी केली.
या भेटीदरम्यान खासदार प्रणिती शिंदे म्हणाल्या की,
“अतिवृष्टी आणि पुरामुळे शेतकऱ्यांचे प्रचंड नुकसान झाले असून, शासनाने जाहीर केलेली मदत अतिशय तुटपुंजी आहे. सरकारने संवेदनशीलतेने वागून शेतकऱ्यांच्या पाठीशी खंबीरपणे उभे राहावे. सर्व निकष बाजूला ठेवून सरसकट हेक्टरी ₹५०,००० मदत शेतकऱ्यांच्या खात्यात जमा करण्यात यावी.”
त्या पुढे म्हणाल्या,
“आज शेतकरी जगला पाहिजे हेच सरकारचे सर्वात मोठे कर्तव्य आहे. आम्ही शेतकऱ्यांच्या बाजूने ठामपणे उभे आहोत. शासनाने नुकसानभरपाई वाढवली नाही, तर आम्ही उपोषणास बसू. पंचनामे करताना दूजाभाव न करता सरसकट आणि निष्पक्ष पंचनामे करण्यात यावेत.”
⸻
अनवलीतील भाटघर कॅनॉलचे पाणी थांबवण्याची मागणी
अनवली गावातील शेतकऱ्यांनी भाटघर कॅनॉलमधून सतत सोडले जाणारे पाणी थांबवण्याची मागणी केली. शेतकऱ्यांचे म्हणणे आहे की या पाण्यामुळे शेतीच्या जमिनींना पाझर लागून मोठे नुकसान होत आहे.
खासदार प्रणिती शिंदे यांनी त्वरित जिल्हाधिकाऱ्यांशी दूरध्वनीवर संपर्क साधून भाटघर कॅनॉलचे पाणी तात्काळ बंद करण्याची मागणी केली. जिल्हाधिकाऱ्यांनी तातडीने आवश्यक ती उपाययोजना करण्याचे आश्वासन खासदार शिंदे यांना दिले.
