कोल्हापूर-सांगली रेल्वे प्रवासी संघटनेचा आदर्श: फटाक्यांचा खर्च टाळला, ३०० पूरग्रस्त कुटुंबांची दिवाळी फराळाने केली ‘गोड’!
सोलापूर/कोल्हापूर: दिनांक
तिऱ्हे (ता. उ. सोलापूर) येथील पूरग्रस्त बाधीत कुटुंबांसाठी खऱ्या अर्थाने समाधानाचा ठेवा’
‘ घेऊन आला. कोल्हापूर ते सांगली रेल्वे प्रवासी संघटनेतील सरकारी कर्मचारी सदस्यांनी यंदा आपल्या घरात फटाक्यांवर एकही पैसा खर्च न करण्याचा ऐतिहासिक निर्णय घेतला आणि त्या बचतीतून ३०० गरजू कुटुंबांना दिवाळीचा फराळ वाटप केला. ‘फुल ना फुलाची पाकळी’ या म्हणीप्रमाणे दिलेली ही छोटीशी मदत पूरग्रस्तांसाठी मोठी ठरली आहे.
रेल्वे, MIDC, जि. प. कोल्हापूर, आणि कोर्टातील अधिकारी अशा विविध विभागांतील सरकारी कर्मचाऱ्यांचा हा संघ आहे. त्यांच्या या कृतीने माणुसकीचा एक नवा आदर्श निर्माण केला आहे.
तिऱ्हे आणि आसपासच्या परिसरातील शेतकऱ्यांचे झालेले नुकसान मोठे आहे. पुराच्या पाण्याने शेतीत,घरात गाळ साचला, उभी पिके पूर्णपणे नष्ट झाली आणि काढणीला आलेले पीक पाण्यात वाहून गेले. अनेकांचे संसारोपयोगी साहित्य आणि जनावरेही वाहून गेली. ऐन दिवाळीच्या तोंडावर सर्वस्व गमावल्यामुळे या कुटुंबांची दिवाळी अंधकारमय झाली होती.
या भागातील शेतकऱ्यांनी त्यांच्या वेदना व्यक्त केली, “पाण्याने आमचे सर्व काही हिरावून घेतले. शेतात काहीही उरले नाही आणि घरही मोडकळीस आले. दिवाळी कशी साजरी करायची हा प्रश्न होता. पण, या सरकारी कर्मचारी मित्र परिवाराने व कोल्हापूर सांगली रेल्वे प्रवासी संघटनेच्या लोकांनी दिलेला फराळ आणि मायेचा आधार पाहून डोळ्यांत पाणी आले. त्यांनी खऱ्या अर्थाने आमच्या घरात थोडा का होईना, पण आनंद आणला.”
गरजुंपर्यंत मदत पोहोचवण्याचे प्रामाणिक प्रयत्न आनंदने करण्यात आले. यावेळी MIDC कोल्हापूर येथील शेजाळ साहेब आणि त्यांच्या मित्रवृंदाने केलेल्या सहकार्याबद्दल संघटनेने कृतज्ञता व्यक्त केली आहे.
या कार्यात हेमंत मधवाने, दिनेश कोळी, सतीश माळवदे, संदीप शेजाळे, सचिन खराडे, स्वप्निल बनसोडे, आणि धनंजय निकम यांचा सक्रिय सहभाग होता.
भारत जाधव बोलताना म्हणाले “या दिवाळीत आमच्या घरात फटाके नाहीत! आम्ही सर्व सहकाऱ्यांनी ठरवले की, फटाक्यांचा क्षणिक आवाज आणि धुरापेक्षा, पूरग्रस्त बांधवांच्या चेहऱ्यावरचा आनंद आमच्यासाठी लाखमोलाचा आहे. शेतकऱ्यांचे झालेले नुकसान हे खूप मोठे आहे. त्यांच्या आयुष्यात थोडा का होईना, गोडवा आणणे हीच आमच्यासाठी खरी लक्ष्मीपूजन आहे. ३०० कुटुंबांना मदत करताना जे समाधान मिळाले, ते कोणत्याही फटाक्यांच्या आतषबाजीपेक्षा मोठे होते.”
धनंजय देशमुख बोलताना म्हणाले “संघटनेतील हे सरकारी अधिकारी केवळ कर्तव्य बजावत नाहीत, तर ते माणुसकीचा धर्मही पाळतात हे आज सिद्ध झाले. पूरग्रस्तांच्या वेदना आम्ही जवळून अनुभवल्या आहेत. सरकारी अधिकाऱ्यांनी एकत्र येऊन स्वतःच्या खर्चातून ही जी सामाजिक जबाबदारी घेतली आहे, ती निश्चितच समाजाला प्रेरणा देणारी आहे. आज त्यांच्या डोळ्यांतील अश्रू पुसण्याचा छोटासा प्रयत्न आम्ही केला.”
सरकारी कर्मचाऱ्यांनी स्वेच्छेने आणि मोठ्या मनाने उचललेले हे पाऊल, पूरग्रस्त शेतकरी कुटुंबांच्या अंधाऱ्या जीवनात दिवाळीचा खरा प्रकाश घेऊन आले आहे.
